Enova tildelte i november i fjor 777 millionar kroner i støtte til fem produksjonsanlegg for hydrogen langs norskekysten.

Etter tildelinga fekk aktørane bak prosjekta tre månader akseptfrist for tilbodet om støtte. Alle fem har no akseptert vilkåra i tilsagnet, og dette markerer eit viktig steg mot realisering av produksjonsanlegga.

Satsinga på hydrogenproduksjon langs kysten blir sett i samanheng med ei satsing på bruk av hydrogen som låg- og nullutsleppsdrivstoff på skip. Under programma «Hydrogen i fartøy» og «Ammoniakk i fartøy» kan Enova støtte bygging av hydrogenfartøy. Målsetjinga er å demonstrere fungerande verdikjeder for hydrogen i maritim sektor fram mot 2030, og danne grunnlaget for den vidare omstillinga av maritim sektor fram mot lågutsleppssamfunnet i 2050.

Dette er prosjekta som fekk støtte til produksjonsanlegg for hydrogen:

• Hydrogenanlegg i Slagentangen i Vestfold: GreenH i samarbeid med Grieg Edge og Esso Norge. Støttebeløp: 144,11 millionar norske kroner.

• Hydrogenanlegg i Egersund i Rogaland: Kaupanes Hydrogen, eigd av Hydrogen Solutions, Dalane Energi og Eigersund Næring og Havn. Støttebeløp: 206 millionar norske kroner.

• Hydrogenanlegg i Florø i Vestland: HyFuel, eigd av Hydrogen Solutions, Fjord Base og Sogn og Fjordane Energi/Nyvinn. Støttebeløp: 180 millionar norske kroner.

• Hydrogenanlegg i Kristiansund i Møre og Romsdal: GreenH. Støttebeløp: 118,66 millionar norske kroner.

• Hydrogenanlegg i Bodø i Nordland: GreenH. Støttebeløp: 128,65 millionar norske kroner.

Les meir om saka også på Norsk Hydrogenforum sine sider.